如果你選擇自己郁手做網站，除咗建網平台，其實仲有其它選擇。
第一種就係學寫code。一般純粹顯示文字及相片嘅網站，牽涉到嘅技術係HTML同CSS，網上亦有大量資源可供學習，甚至乎有Ｄ已經寫好咗嘅模版(template)可以下載嚟用，改改入面嘅相片同文字，已經可以有一個設計唔錯嘅網站。
第二種係安裝一Ｄ人地已經寫好嘅網站系統，例如Wordpress、 Joomla、Drupal，呢類網站系統功能強大，除咗適用於一般網站、blog之外，只要加上適當嘅插件(Plugin)，仲可以做到網上商店、存貨管理、會員管理、POS等功能。依家好多網頁寄存公司，已經提供一鍵安裝呢類系統。不過如果你唔滿足於安裝後提供嘅基本設定，需要進行修改嘅話，所需要嘅技術含量就較高。其實呢類系統，係比識嘅人將網站安裝好，再比唔識嘅人使用，遇到問題時往往需要有相關知識先至有能力解決。
第三種方法就要睇你嘅網頁寄存公司有冇提供建網工具(site builder) 呢類服務，佢同上一篇文章介紹嘅建網平台相類似，不過相對上就冇嗰Ｄ平台功能咁強大，亦因為咁，使用上亦相對容易。
頭兩種方法都可以好方便將網站移植到其它寄存公司，即係你唔會比任何一間公司縛住，隨時都可以將整個網站帶走，而缺點係，你點都要花Ｄ時間去自學，而短時間學會所做出嚟嘅網站，相對由專業人仕做嘅當然會有所不足。